Venantius Fortunatus carminum libri 10, 13


13.

Pontifices summi, fidei uia, semita uitae,

      Quos dedit omnipotens luminis esse duces

Custodesque gregi caelestis contulit agnus,

      Vos bene pastores, ut foueantur oues:

5

Ecce uiator adest peragens iter inscius illud

      Finibus Italicis, heu peregrina gemens.

Exulis auxilium, errantis uia, norma salutis;

      Ad reditum patriae sitis honore patres.

Semina iactetis, mercedis ut ampla metatis

10

      Et redeat uobis centuplicata seges.

Fortunatus enim humilis commender opimis

      Ac per uos domino, culmina sancta, precor.