221.

Rursum Camena paruo

Phaleras parat libello

Et uult amicta fictis

Commenta ferre primum

5

Memorans frigente uero

Nil posse comere usum

Vitioque dat poetae

Infracta ferre certa

Lasciua dans lepori

10

Et paginam uenustans

Multo illitam colore;

"Atquin prioris ille

Titulus monet libelli

Mythos ab ore pulsos

15

Artesque uera fantes

Voluminum sequentum

Praecepta comparare."

At haec iocante rictu

"Nil mentiamur" inquit

20

"Et uestiantur Artes.

An tu gregem sororum

Nudum dabis iugandis,

Et sic petent Tonantis

Et caelitum senatum?

25

Aut si tacere cultum

Placet, ordo quis probatur?"

"Certe loquentur illae,

Quicquid erat docendum,

Habitusque consequentur

30

Asomato in profatu".

"Haec nempe ficta uox est

Et deuius promissi es;

Cur ergo non fateris

Ni figminis figura

35

Nil posse comparari?"

His me Camena uicit:

Fugis? "iugabo ludum."

262.

Praestricta est cursim rationis regula primae,

      Quae multis tendi sueta uoluminibus.

In qua iuncturis quid nectat littera utrisque,

      Quo admittat sociam uel faciat latere,

5

Quae quo transiliat conuersis legibus usu,

      Et transformatum nomen habere uelit,

Quas oris sonitus uel quas modulatio linguae

      Gignant et pulsu rupta labella suo.

Nunc iam compactis cursanda est syllaba formis,

10

      Vt fastigetur longa breuisque fuat.

Haec duo percurram, iuncturas littera quippe

      Praeueniens docuit sub ratione pari.

Hoc igitur subdens nectendum concipit ordo,

      Si uestrum, superi, comprobat arbitrium.

289.

Expleta cursim syllabarum pagina est;

Iuganda demum uerba. nam probabilis

Hic ordo rebus, quique disgregabitur

In bina demum. prima nam proportio

5

Dicenda, Graii analogiam quam uocant.

Ac mox repulsa quae nouantur regula

Vulgoque docti quae anomala nominant,

Bis quarta fandi quis paratur portio,

Vel uulneratur ductus oris integer,

10

Quantumque solo inditum libellulo

Potest probare serium fastidium.