Martialis de spectaculis 7

Reference basis text: W. M. Lindsay, 1929

Editing of the digital edition: M. Manca, 2009

Other sections


Qualiter in Scythica religatus rupe Prometheus

      Assiduam nimio pectore pauit auem,

Nuda Caledonio sic uiscera praebuit urso

      Non falsa pendens in cruce Laureolus.

5

Viuebant laceri membris stillantibus artus

      Inque omni nusquam corpore corpus erat.

Denique supplicium dignum tulit: ille parentis

      Vel domini iugulum foderat ense nocens,

Templa uel arcano demens spoliauerat auro,

10

      Subdiderat saeuas uel tibi, Roma, faces.

Vicerat antiquae sceleratus crimina famae,

      In quo, quae fuerat fabula, poena fuit.

7

dignum tulit: ille parentis suppl. Schneidewin

om. T